منوعات

#إحسان_شريف

تصدق بـ الله! هـ تصدق إن شاء الله فيلم إشاعة حب كان مكتوب أصلا لـ "إسماعيل ياسين" كان هـ يعمل دور حسين، اللي عمله عمر الشريف.

قولي والمصحف! والمصحف والله زي ما بأقولك كدة كان المفروض يبقى فيلم بـ أبطال تانيين خالص، حاجة كدا ابن حميدو ستايل، بس إسماعيل ياسين كان فـ عزه، ومشغول فـ 500 فيلم، و700 حاجة، فـ فطين عبد الوهاب قرر حاجة تانية خالص.

فطين كان في ذهنه من قبلها إنه عايز يعمل فيلم كوميدي بـ ممثلين اشتهروا بـ أدوار تراجيدية، وتراجيدية من النوع الغميق، اللي هم أبعد ما يكونوا عن الكوميديا، فـ لما إسماعيل انشغل، قال لك نشتغل على المشروع دا.

عمر الشريف ويوسف وهبي أبرز الفنانين دول، لكن كمان اختار في دور بنت سلطح باشا إحسان شريف.

أهي إحسان شريف دي هي اللي حابة أحكي لك النهاردة حكايتها إحسان كانت مرات زكي طليمات، آرثر الطيب في فيلم عبد الناصر صلاح الدين، وانفصلوا وكل شغلها لـ حد الفيلم دا كان تراجيديا.

إحسان مواليد حلوان، أهلها ربوها وعلموها، ووصلت لـ حد البكالوريا، اللي خدتها من مدرسة حلوان الثانوية، وكانت غاوية التمثيل، بس مكنتش زي كتير من الفنانين اللي بـ يلفوا ع الفرق، هي كانت من أسرة عادية مستقرة، فـ كان أغلب شغلها في البدايات مع فرق الهواة.

اللي اكتشفها هو طليمات، وبعدين اتجوزها، قبل ما ينفصلوا واعتمدت على المسرح فترة، لـ حد ما انتظمت في شغل السيما.

حكاية إنها بنت ناس دي، خلتهم يستعينوا بيها في دور البنت الأرستقراطية المنفوخة نفخة كدابة، والكاراكتر دة لزق فيها، فـ حصرها في المساحة دي تقريبا، مع إننا مثلا شفناها بعدين في أدوار مختلفة.

إحسان هي أم أحمد زكي في "النمر الأسود" ست فقيرة غلبانة، وقدمته حلو، هي كمان الداية في فيلم البوسطجي، اللي بـ تنقل أخبار البلد، وبرضه قدمته حلو، وغيره وغيره، بس مش كتير لما بـ نلتفت لإمكانيات الممثل، إحنا بـ نشوفه عمل إيه وأجاد فيه، فـ نحلبه في هذا الكاركتر.

بدأت إحسان مشوار السيما بدري، بـ فيلم "هدية" مع محمود ذو الفقار، بس بعده محدش بقى بـ يديها أدوار أكتر من خمس سنين، لـ حد ما طلبوها في فيلم مع كمال الشناوي، وشادية اسمه بين قلبين.

فضلت تعمل الحتت الصغيرة، لـ حد ما عملت دور بارز في فيلم "أين عمري؟".

أين عمري دا كان رواية لإحسان عبد القدوس، والفيلم كان بطولة ماجدة الصباحي، وإنتاجها، ومشهور بـ اسم "عمو عزيز" الجملة اللي كانت بـ تقولها ماجدة لـ زكي رستم، قبل ما يتجوزها، وتعيش معاه حياة القسوة واللي بالك فيه.

كان مطلوب ممثلة تلعب دور أخت عمو عزيز العانس، ودا دور صعب من ناحية التمثيل، والفنانات يهربوا منه، فلما اختاروا إحسان ما ترددتش، وعملت الدور كويس، ودا اللي خلاها حاضرة في الذهن، فـ لما فكر فطين في بنت سلطح باشا، نطت إحسان، وكلنا شفناها في الدور، وفاكرين جملتها: "بلدي أوي دي يا حسين".

من ساعتها، وإحسان اشتغلت بـ صفة منتظمة في الأدوار اللي زي دي، لـ حد ما اتوفت بعد ما عملت دورها في "شهد الملكة"، آخر أفلامها ربنا يرحمها ويرحم الجميع